विराटनगर महानगरपालिकाका मेयर नागेश कोइराला कृषि र सहकारी अभ्यासको अध्ययन भ्रमणका लागि जेठ २६ गते इजरायल गएका थिए। त्यहाँ पुगेपछि सुरु भएको इजरायल–इरान युद्धका कारण अहिले उनको बंकरको बास भएको छ।

त्रिभुवन अन्तर्राष्ट्रिय विमानस्थलबाट दुबई ट्रान्जिट हुँदै इजरायल पुगेका कोइरालाले निर्धारित कार्यक्रमअनुसार इजरायलमा विभिन्न सहकारी र कृषि परियोजनाको अवलोकन गर्ने तालिका बनाएका थिए।

उनी इजरायल पुगेको तेस्रो दिन अर्थात् जेठ २९ गते इजरायलले इरानमाथि हमला गरेपछि युद्ध सुरु भयो। युद्ध सुरु भएलगत्तै इजरायलभर आपतकालीन अवस्था लागू भयो। मेयर कोइराला इजरायलको सेफाइम सहरको सहकारी अतिथि गृहमा बसेका थिए। युद्ध सुरु भएपछि उनीसहित फिलिपिन्सका १७ जना जनप्रतिनिधि बंकरमा बस्न बाध्य भएका छन्।

साइरन बज्नेबित्तिकै उनीहरू बंकरमा छिर्छन् र साइरन रोकिएपछि मात्र बाहिर निस्कने गरेका छन्। कोइरालाका अनुसार साइरन बजेको डेढ मिनेटभित्र बंकरमा पुग्नुपर्ने बाध्यता छ। पटक–पटक बंकरमा जानु परेको अनुभव उनले सुनाएका छन्।

उनी इजरायलको विदेश मन्त्रालयको निमन्त्रणामा कृषि र सहकारी अवलोकनका लागि गएका थिए। निर्धारित कार्यक्रमअनुसार प्रत्येक सहकारी क्षेत्रमा तीन दिनको बसाइ र अध्ययन तय गरिएको थियो। तर युद्ध सुरु भएपछि अन्य गन्तव्यमा जान पाएका छैनन्।

नेपाल फर्किनका लागि कोइरालालाई अहिले जोर्डन, कुवेत र भारत हुँदै आउने तयारी गरिएको प्रेस संयोजक मिनकुमार नबोदितले जनाएका छन्। इजरायलमा विमानस्थल बन्द भएकाले वैकल्पिक बाटो खोजी गरिएको हो।

नेपाली राजदूत धनप्रसाद पण्डितले कोइरालालाई आफ्नो निवासमा बस्न अनुरोध गरे पनि उनी टोली नछाड्ने अडानमा छन्। इजरायलस्थित अन्य नेपालीहरू पनि सुरक्षित रहेको राजदूत पण्डितले जनाएका छन्।